Daniil Medvedev urushga qarshi chiqdi
Rossiyalik tennischi Instagram‘dagi profilidan Rossiya bayrog‘ini olib tashladi.
“US Open-2021” turniri g‘olibi, dunyoning birinchi raqamli raketkachisi rossiyalik Daniil Medvedev Instagram ijtimoiy tarmog‘idagi sahifasidagi profil tavsifidan Rossiya bayrog‘i tasvirini olib tashladi. Quyidagi skrinshotlardan ko‘rinib turibdiki, avvalroq Medvedev profilining tavsifida Rossiya bayrog‘i bo‘lgan, hozir esa u yo‘q.
Eslatib o‘tamiz, 28-fevral, dushanba kuni Daniil Medvedev o‘z faoliyatida ilk bor ATP reytingida birinchi o‘rinni egallagandi. “Katta Dubulg‘a” turkumiga kiruvchi turnirlarning 20 karra chempioni Novak Jokovichni ortda qoldirgan edi.
Maʼlumot o‘rnida: yanvar oyida Medvedev Avstraliya ochiq chempionatining finalida ispaniyalik Rafael Nadalga yutqazib qo‘ygandi.
Avvalroq, rossiyalik tennischi dunyoning birinchi raqamli tennischisiga aylangani haqida xabar berilgandi.
Jamshidbek Amirov
