Janubiy Koreyaning yangi prezidenti qarorgohini o‘zgartirmoqchi
Bu davlat byudjetiga 820 million dollarga tushadi.
Janubiy Koreyaning saylangan prezidenti bosh qarorgohini boshqa joyga ko‘chiradi. Bu haqda “TASS” xabar berdi.
Unga ko‘ra, yangi prezident Yun Sok Yol Janubiy Koreya prezidentlarining anʼanaviy qarorgohi – Moviy Uydan voz kechib, o‘z faoliyatini Tashqi ishlar vazirligi yoki mudofaa vazirligi binosida davom ettiradi. Prezident kanselyariyasi vakili Kim In Xining so‘zlariga ko‘ra, prezident saroyi xalqqa birinchi bahor gullari ochilguncha qaytarib beriladi.
Davlat rahbari qarorgohini o‘zgartirish Yun Sok Yolning saylovoldi vaʼdalaridan biri edi. “Moviy uy uzoq yillar davomida mutlaq hokimiyatning ramzi bo‘lib keldi. Endi esa hokimiyatni xalqqa qaytarish vaqti keldi”, – deb qo‘shimcha qilgan Kim In Xi.
OAV maʼlumotlariga ko‘ra, prezident qarorgohi o‘zgartirilishi davlat g‘aznasiga 820 million dollarga tushadi.
Maʼlumot o‘rnida: 2022-yil 9-mart kuni Janubiy Koreyada prezidentlik saylovi bo‘lib o‘tdi. Unda “Fuqarolik kuchi” partiyasi nomzodi Yun Sok Yol g‘alaba qozondi.
Eslatib o‘tamiz, avvalroq Janubiy Koreyaning amaldagi prezidenti Mun Chje In Yaponiya bilan munosabatlar haqida gapirgandi.
