Ronaldo professional klub egasiga aylandi
Sobiq futbolchi 70 million dollarga yangi jamoa sotib oldi.
Braziliyalik sobiq hujumchi, ikki karra jahon chempioni Ronaldo “Kruzeyro” jamoasining 90 foiz aksiyasini sotib olib, jamoa egasiga aylandi. Bu haqda klub sayti maʼlum qildi. Kelishuv sobiq futbolchiga 70 million dollarga tushgan.
Shu tariqa “Kruzeyro” Ronaldoga tegishli ikkinchi klubga aylandi. U shuningdek, Ispaniyaning “Valyadolid” klubiga ham egalik qiladi.
Eslatib o‘tamiz, 1993 yilda Ronaldo o‘zining birinchi professional futbol klubi “Kruzeyro”ga 50 000 dollar evaziga ko‘chib o‘tgan edi. Klub safida 1993 yilning iyul oyidan 1994 yilning avgustiga qadar to‘p surgan. U bu vaqt mobaynida 57 ta gol urib klubning eng yaxshi to‘purariga aylangan. Shundan so‘ng Yevropa klublari unga jiddiy qiziqish bildirgan. Shu tariqa Ronaldo 1994 yilda Gollandiyaning “PSV” klubiga o‘tadi va u yerdan Yevropadagi faoliyati boshlanadi.
Avvalroq, Ronalduning avtoparki namoyish etilgani haqida xabar berilgandi.
Jamshidbek Amirov
