Ronaldu “Liverpul” muxlislariga rahmat aytdi
Hujumchi yaqinda yangi tug‘ilgan o‘g‘lidan ayrilgan edi.
Ronaldu o‘g‘lining o‘limi munosabati bilan uni qo‘llab-quvvatlagan “Liverpul” muxlislariga murojaat qildi.
“Manchester Yunayted” hujumchisi Krishtianu Ronaldu “Liverpul” muxlislariga yangi tug‘ilgan o‘g‘lining o‘limi munosabati bilan uni qo‘llab-quvvatlaganliklari uchun minnatdorchilik bildirdi.
“Bir dunyo… Bitta sport… Bitta katta oila… Rahmat “Enfild”. Men va mening oilam bu hurmat va rahm-shafqat ishorasini hech qachon unutmaymiz”, — deb yozdi Ronaldu o‘zining ijtimoiy tarmoqlardagi sahifasida.
Eslatib o‘tamiz, 30-tur uchrashuvidan o‘rin olgan “Liverpul” — “Manchester Yunayted” o‘yini Liverpuldagi “Enfild” stadionida bo‘lib o‘tdi va 4:0 hisobida yakunlandi. Mazkur uchrashuvning yettinchi daqiqasida “Enfild”dagi muxlislar Ronalduni olqishlar bilan qo‘llab-quvvatlashdi. “Liverpul” bosh murabbiyi Yurgen Klopp ham chetda turmadi va muxlislar bilan birga olqishladi. Krishtianuning o‘zi oilaviy ahvoli og‘ir bo‘lgani uchun o‘yinni o‘tkazib yubordi.
Avvalroq, Ronaldu jamoadoshlarini tanqid qilgani haqida xabar berilgandi.
Jamshidbek Amirov
