“Paxtakor”dagi qonun buzuvchilar aniqlandi
Ularning 10 nafariga maʼmuriy qamoq jazosi tayinlangan.
Joriy yilning 11 iyun kuni Toshkent shahridagi “Paxtakor” stadionida Osiyo kubogi o‘yinlari doirasida 23 yoshgacha bo‘lgan futbolchilardan iborat “O‘zbekiston” va “Iroq” terma jamoalari o‘rtasidagi futbol o‘yini bo‘lib o‘tdi. Uchrashuvning 12 daqiqasida hakam tomonidan O‘zbekiston terma jamoasining darvozaboniga qizil kartochka ko‘rsatildi. Hamda 11 metrlik jarima to‘pi belgilandi.
Muxlislar esa bu holatga norozi bo‘lib, plastmassa suv idishi va stakan, oyoq ostidagi beton parchalarini stadionga uloqtirgan. Natijada stadionda fotomuxbir bo‘lib xizmat olib borayotgan fuqaro 1992 yilda tug‘ilgan J.S. qorin bo‘shlig‘idan jarohat olgan. Unga zudlik bilan tibbiy yordam ko‘rsatilgan.
Mazkur holat yuzasidan Toshkent shahar IIBB tomonidan tekshiruv o‘tkazilmoqda. Tekshiruv davomida jamoat tartibini buzgan 47 nafar shaxslar aniqlanib, ularning 6 nafari: 1998 yilda tug‘ilgan A.Faxriddin, 1991 yilda tug‘ilgan T.Sarvar, 1984 yilda tug‘ilgan B.To‘xtamurod, 2003 yilda tug‘ilgan J.Bexzod, 2002 yilda tug‘ilgan V.Mexroj, 1998 yilda tug‘ilgan X.Abrorlarga sud tomonidan 15 sutka maʼmuriy qamoq jazosi tayinlandi. Bundan tashqari 10 nafar fuqaro 10 sutka maʼmuriy qamoq, 3 nafari jarima jazosiga tortilgan, 28 nafariga nisbatan surishtiruv davom etmoqda. Shuningdek, fuqaro J.S. unga narsa otgan shaxsga nisbatan daʼvosi yo‘qligini maʼlum qilib va ariza yozishdan bosh tortgan.
