Farg‘onada 60 yoshli erkak alkogoldan zaharlanib, vafot etdi
Ijtimoiy tarmoqda uni IIB xodimi kaltaklagani aytilmoqda.
Ijtimoiy tarmoqlarda Quvasoy shahar Lashkar qishlog‘ida IIB uchastka inspektori bir fuqaroni urib, jarohat yetkazgani haqida xabar tarqalgan. Holat yuzasidan Farg‘ona viloyat prokuraturasi rasmiy bayonot e’lon qildi.
27-avgust kuni soat 19:00 larda Quvasoy shahar “Yuqori Mo‘yan” MFY hududida 1962-yilda tug‘ilgan fuqaro X. T. jamoat tartibini buzuvchi harakatlar sodir etgan. Shundan so‘ng Quvasoy shahar IIB xodimlari tomonidan mastlik holatini tekshirish maqsadida shahar tibbiyot birlashmasiga olib ketilayotgan vaqtda uni sog‘lig‘i yomonlashib, ko‘rsatilgan tibbiy yordamga qaramasdan vafot etgan.
Sudga oid tibbiy ekspertizaning dastlabki ma’lumotiga ko‘ra, X. T.ning o‘limiga “Yurakning ishemik kasalligi, yurak toj kon tomirlarini o‘tkir yetishmovchiligi, o‘ng tomonlama pnevmoniya, surunkali plevrit, oshqozonosti beziga qon quyilishi, alkogoldan zaharlanish” tashxisi qo‘yilgan.
Hozirda mazkur holat yuzasidan Quvasoy shahar prokuraturasi tomonidan tergovga qadar tekshiruv olib borilmoqda. Tekshiruv jarayoni viloyat prokuraturasi tomonidan nazoratga olingan.
