Federer tennisdagi faoliyatini yakunladi
U 24 yil davomida 1500 dan ortiq o‘yin o‘tkazdi.
Faoliyatini AQSH Ochiq chempionatida yakunlagan Serena Uilyams ortidan, bu tennis yulduzi Rojer Federer sport bilan xayrlashmoqda. Aniqrog‘i, endi u menejer va funksioner sifatida ish boshlashi kutilmoqda.
“Men tennisni hech qachon tark etmayman”
“Oxirgi paytlarda tanamdagi og‘riqlar meni ko‘p qiynadi”, — deb yozgan Federer xayrlashuv maktubida. 1500 dan ortiq o‘yin o‘tkazdim. Shu fursatda uzoq yillik faoliyatimni yakunlashim kerakligini tushunib yetdim. Tennisga bo‘lgan muhabbatim tug‘ilganda, men hali bola edim. Tennischilarning o‘yinlarini hayrat bilan kuzatardim. Shundan so‘ng sportchi bo‘lishni orzu qila boshladim. Orzularim meni ko‘proq mehnat qilishga majbur qildi. Bu esa o‘zimga ishonchni oshirdi. Shveysariyalik yosh bolakayning orzularini ro‘yobga chiqarishga yordam bergan barchaga, butun dunyodagi muxlislarimga chin qalbimdan minnatdorchilik bildirmoqchiman. Tennis sabab ularga mehrim oshdi va shuni aniq aytamanki, men hech qachon uni tark etmayman”.
20 karra xalqaro musobaqalar g‘olibini barcha 23 sentyabr kuni Londonda o‘tadigan turnirda qatnashishini kutayotgandi. Sababi, u yerda dunyo reytingida yuqori pog‘onada joylashgan Novak Jokovich, Rafael Nadal va Endi Marrey ishtirok etadi. Top tennischilarning o‘zaro raqobati muxlislarning diqqat-markazida bo‘lib turibdi. Shveysariyalik tennischining yaqinlari sportchi faoliyatida kuzatilayotgan jarohatlar sabab shu qarorga kelishga majbur bo‘lganini aytmoqda.
“Tennis olami endi avvalgidek bo‘lmaydi”
Tennis ixlosmandlarining barchasi uni juda sog‘inadi. Muxlislar Rojerni yana tennis o‘ynashini ko‘rishni xohlaydi. 3 iyul kuni Federer “Uimbldon” turnirining 100 yilligi tantanasiga kutilmagan mehmon sifatida kelganida unga bo‘lgan iliq munosabatdan ham buni bilib olish qiyin emas. Boshqa afsonalarning hech biri ommaning bu tarzdagi olqishlariga sazovor bo‘lmagan.
Ispaniyalik tennis yulduzi Rafael Nadal Federer haqida quyidagi fikrlarni bildirib o‘tdi: “Rojer, mening aziz do‘stim va raqibim. Bu kun hech qachon kelmasligiga umid qilgandim. Bugun shaxsan men uchun balki, butun tennis olami uchun qayg‘uli kundir.
Rojer Federer faoliyatini 1998 yilda boshlagandi. U bu vaqt davomida “Rolex”, “Nike”, “Mercedes-Benz”, “Credit Suisse”, “Jura”, “Moet & Chandon”, “Barilla”, “Lindt” va “Wilson” kabi homiylar bilan hamkorlikda ishlagan.
