“Liverpul”ning savdosi pishyapti
Dubayliklar ingliz klubiga katta summa taklif qildi.
Dubay hukumati va uning hukmron oilasining jamoat fondi bo‘lgan “Dubai Holding”ning investitsiya bo‘limi bo‘lgan “Dubai International Capital” “Liverpul”ni sotib olish imkoniyatini ko‘rib chiqmoqda. Bu haqda “Mirror” nashri xabar berdi.
Manbaga ko‘ra, kelishuv summasi taxminan 4,9 milliard yevroni tashkil qilishi mumkin. Shuningdek, arab kompaniyasi 2007 yildayoq “Liverpul”ni sotib olishga daʼvo qilgan, biroq 300 million yevrodan sal ko‘proq taklif klub tomonidan rad etilgan.
Eslatib o‘tamiz, avvalroq “Fenway Sports Group” rahbari va “Liverpul” xo‘jayini Jon Anri klubni qaysi summaga sotishga tayyorligini aytgan edi. Amerikalik tadbirkor 4,6 milliard yevro evaziga jamoa bilan xayrlashishga rozi.
Jon Anri “Liverpul”ni 2010 yilda sotib olgan. Uning boshqaruvi davrida klub Chempionlar Ligasi (2019), Angliya Premyer-ligasi (2020), UEFA Superkubogi (2019), Angliya Kubogi (2022), Angliya Superkubogi (2022), Angliya Ligasi kubogi (2022) sohibi bo‘lgan.
