Namangandagi uyda tunda gaz portladi
Xonadonda imkoniyati cheklangan fuqaro yashagan.
Bugun, 11-dekabr kuni Namangan shahridagi xonadonlardan birida yong‘in chiqdi. Holat yuzasidan viloyat FVB ma’lumot berdi.
Qayd etilishicha, soat 01:13 da Namangan shahri “Diyor” MFY hududida joylashgan xonadonlarning birida yong‘in sodir bo‘layotganligi haqida FVBga xabar kelib tushgan. Shunga ko‘ra, 1,3-sonli yong‘in qutqaruv qismining ekipajlari voqea joyiga yuborilgan, yong‘in qutqaruvchilar tomonidan soat 01:45 da to‘liq bartaraf etilgan.
Hodisa oqibatida xonadon egasi — 1952-yilda tug‘ilgan fuqaro 65 foiz, uning o‘g‘li — 1980-yilda tug‘ilgan 2-guruh nogironi 95 foiz (o‘ta og‘ir darajada) kuyib, tan jarohati olgan. Yashash uyining shift va tom qismidan 70 kvadrat metr joyi hamda uy-ro‘zg‘or buyumlari yonib zararlangan.
Yong‘in gaz va havo aralashmasining chaqnashi natijasida sodir bo‘lgan deb taxmin qilinmoqda. Xonadon egasi bilan suhbatlashilganda uyni isitish maqsadida qo‘lda yasalgan tunika pechiga gaz soʻrg‘ich o‘rnatilganini bayon etgan.
Hozirda tergovga qadar surushtiruv ishlari olib borilmoqda.
