Namanganda YPX xodimi mashinada “uxlab yotib pul topayotgani” aytildi
Holatga viloyat YHXB rasmiy izoh berdi.
Ijtimoiy tarmoqlarda Namangan viloyatining Pop tumanida YPX inspektori xizmat vaqtida uxlayotgani, mashina ichiga o‘rnatilgan multiradar orqali qoidabuzarliklarni yozayotgani aytilgan video tarqaldi. Holat yuzasidan viloyat YHXB rasmiy munosabat bildirdi.
Qayd etilishicha, 17 dekabr kuni ikki nafar inspektor Pop tumanidagi avtomobillarga gaz to‘ldirish shoxobchasiga biriktirilgan. Xodimlarning biri tashqarida xizmat o‘tayotgan vaqtda ikkinchisi shaxsiy avtomashinasida dam olayotgan holati nomaʼlum shaxs tomonidan tasvirga olib tarqatib yuborilgan.
“Qoidabuzarliklarni qayd etuvchi qurilma deb ko‘rsatilgan vosita esa profilaktik maqsadda xodimning shaxsiy avtomashinasida xizmat olib borish jarayonida o‘rnatilgan kuzatuv vositasi bo‘lib, qoidabuzarliklarni qayd etmaydi. Hozirda holat yuzasidan xizmat tekshiruvi tayinlangan”, — deyiladi xabarda.
