Tojikistonlik fuqaro O‘zbekistonga giyohvand modda olib kirmoqchi bo‘ldi
U narkotikni bosh kiyimiga yashirgan.
Namangan viloyatining Pop tumanidagi chegara postida bosh kiyimi orqali giyohvand modda olib kirishga uringan shaxs qo‘lga olindi. Bu haqda viloyat IIB axborot xizmati xabar berdi.
Qayd etilishicha, “Pop” chegara bojxona postida piyoda harakatlanayotgan Tojikiston fuqarosi B.D. bojxona nazoratidan o‘tkazilgan.
Natijada uning bosh kiyimi ichida qora rangli polietilen paketchalarga o‘ralgan to‘rt bo‘lak ovalsimon shakldagi, to‘q jigarrang rangli, o‘tkir hidli giyohvand moddaga o‘xshash modda borligi aniqlangan. Shundan so‘ng tekshirib ko‘rishlik uchun vaqtincha saqlovga olingan.
Ekspert xulosasiga ko‘ra, ashyoviy dalil sifatida olingan to‘rt bo‘lak modda “gashish” giyohvandlik moddasi bo‘lib, uning sof og‘irligi 16,07 grammga teng ekani maʼlum qilingan.
Hozirda holat yuzasidan jinoyat ishi qo‘zg‘atilib, tergov harakatlari olib borilmoqda.
