Terroristik tashkilot hududini qo‘riqlagan namanganlik yigit 9 yilga “kesildi”
U tashkilot sobiq yetakchisining maʼruzalarini muntazam tinglab kelgan.
Suriyada terroristik tashkilot joylashgan hududni qo‘riqlagan namanganlik 24 yoshli yigit ozodlikdan mahrum qilindi. Bu haqda “Yangi O‘zbekiston” nashri xabar berdi.
Qayd etilishicha, yigit 2020 yilning sentyabr oyida mavsumiy ishlash maqsadida Turkiyaning Istanbul shahriga borgan. Tikuvchilik sexida ishlashi davrida internet orqali “Tavhid va jihod katibasi” terroristik tashkiloti sobiq yetakchisi “Abu Saloh”ning maʼruzalarini muntazam tinglagan va unda ekstremistik qarashlar shakllangan.
So‘ngra “Tavhid va jihod katibasi” jangarilari safiga qo‘shilish maqsadida internet orqali mazkur tashkilotning 2 nafar aʼzosi bilan tanishib, ularning yo‘l-yo‘riqlari asosida 2021 yilning yanvar oyida Suriya davlatiga o‘tgan.
U yerda harbiy tayyorgarlikdan o‘tib, “Tavhid va jihod katibasi” terroristik tashkiloti joylashgan hududni qo‘riqlash bilan shug‘ullangan.
Terrorizmga qarshi kurashish doirasida ushbu shaxs 2022 yilning iyun oyida u O‘zbekistonga olib kelingan hamda Davlat xavfsizlik xizmatining Tergov boshqarmasi tomonidan unga nisbatan jinoyat ishi qo‘zg‘atilgan.
Jinoyat ishlari bo‘yicha To‘raqo‘rg‘on tuman sudining hukmiga asosan mazkur fuqaro Jinoyat Kodeksining 155-2 moddasining 1-qismi va 244-2 moddasining 1-qismi bilan aybdor deb topilib, unga 9 yil muddatga ozodlikdan mahrum qilish jazosi tayinlangan.
