Namanganlik ayol erining eʼtiborini tortish uchun jinoyatga qo‘l urdi
Hozirda u garovga olingan.
Namangan viloyatining To‘raqo‘rg‘on tumanida ayol erining eʼtiborini tortish maqsadida jinoyatga qo‘l urdi. Holat yuzasidan viloyat IIB maʼlumot berdi.
Joriy yilning 10 fevral kuni To‘raqo‘rg‘on tumani IIBga 21 yoshli B.M. qo‘ng‘iroq qilib, nomaʼlum shaxs uning xonadoniga yuziga niqob taqqan holda kirib, uni va 1 yoshli qizini o‘ldirish bilan qo‘rqitganini, hayot va sog‘lik uchun xavfli bo‘lgan zo‘rlik ishlatib qo‘lida bo‘lgan pichoq bilan uning bo‘yin qismiga jarohat yetkazgani va uyida bo‘lgan narxi 19 mln 200 ming so‘mlik tilla-taqinchoqlarini bosqinchilik yo‘li bilan qo‘lga kiritib, voqea joyidan yashiringanini xabar qilgan.
Mazkur holat yuzasidan tuman IIB huzuridagi Tergov bo‘linmasi tomonidan nomaʼlum shaxsga nisbatan Jinoyat kodeksning 164-moddasi 3-qismi «v» bandi (bosqinchilik) bilan jinoyat ishi qo‘zg‘atilgan.
Maʼlum bo‘lishicha, jabrlanuvchi B.M. turmush o‘rtog‘i unga nisbatan beeʼtibor bo‘layotgani sababli uning eʼtiborini o‘ziga jalb qilish maqsadida,shu kuni xonadonida hech kim yo‘qligidan foydalanib, barcha xonalarini titib tashlagan. Birga yashovchi qaynonasi yotoqxonasidan 19 mln 200 ming so‘mlik tilla-taqinchoqlarini yashirib, bo‘yniga igna orqali shilinma tortgan va go‘yoki yashash xonadoniga nomaʼlum shaxs g‘ayriqonuniy ravishda kirib, pichoq bilan o‘zi va chaqalog‘ini o‘ldirish bilan qo‘rqitib, tilla taqinchoqlarni olib ketganligi haqida To‘raqo‘rg‘on tumani IIBga yolg‘on xabar bergan.
B.M.ning yashash xonadoni ko‘zdan kechirilganda o‘zi tomonidan yashirilgan tilla taqinchoqlar ashyoviy dalil sifatida xolislar ishtirokida rasmiylashtirib olingan.
Mazkur holat yuzasidan B.M. Jinoyat kodeksning 237-moddasi 2-qismi «G» bandi (o‘ta og‘ir jinoyat sodir etishda ayblab sodir etilgan yolg‘on xabar berish) bilan ayblanuvchi tariqasida ishda ishtirok etishga jalb qilinib, unga nisbatan “garov” ehtiyot chorasi qo‘llanilgan.
Jinoyat ishi ayblov xulosasi bilan tegishli sudlov organiga yuborish masalasini hal etish uchun To‘raqo‘rg‘on tuman prokuraturasiga yuborilgan.
