Namangan–Jidda yo‘nalishida parvozlar yo‘lga qo‘yildi
Ilk reysda 150 nafar yo‘lovchi Jiddaga jo‘nab ketgan.
Bugun, 2 aprel kuni Centrum Air mahalliy aviakompaniyasining Boeing–737 rusumli havo kemasi Namangan xalqaro aeroportiga kelib qo‘ndi. Bu haqda Transport vazirligi axborot xizmati xabar berdi.
Aviakompaniya Namangan xalqaro aeroportidan ilk bor Namangan – Jidda yo‘nalishidagi aviaqatnovni yo‘lga qo‘ydi.
Anʼanaga muvofiq, ushbu yangi yo‘nalishning ochilishi tantanali ravishda tashkil etilib, havo kemasi suv arkasi bilan kutib olindi.
Ilk reysda 150 nafar yo‘lovchi Jiddaga jo‘nab ketdi. Avikompaniya tomonidan Namangan — Jidda yo‘nalishi bo‘yicha muntazam yo‘lovchi qatnovlari haftasiga 7-10 reysgacha Boeing–737 va Airbus A320 rusumidagi samolyotlarda amalga oshirilishi rejalashtirilgan.
