Arujan Kamalova xalqaro turnirda kumush medal sohibi bo‘ldi
Fransiyaning Mes shahrida o‘tkazilayotgan “WTT Youth Series” turnirining 13 yoshli sportchilar o‘rtasidagi bahslarida hamyurtimiz Arujan Kamalova kumush medal sohibiga aylandi.
Xalqaro stol tennisi federatsiyasi taqvimidan o‘rin olgan mazkur nufuzli musobaqada O‘zbekiston terma jamoasining aʼzolari bo‘lgan Asel Yerkebayeva, Marhabo Magdiyeva va Arujan Kamalova o‘z yosh yo‘nalishlarida sovrinli o‘rinlar uchun kurash olib bormoqda.
Kecha xalqaro turnirning U-13 toifasida Arujan Kamalova hamda U-15 toifasida Asel Yerkebayeva o‘z ishtiroklarini yakunladi.
Isteʼdodli kichik raketkachimiz A.Kamalova saralash musobaqalarini muvaffaqiyatli o‘tkazdi. Asosiy bellashuvlarda portugaliyalik Lenor Gomesni, ukrainalik Valeriya Korzunni, singapurlik Tan Klarani, fransiyalik Liza Jaoni mag‘lub etdi. Eʼtiborlisi, hamyurtimiz ushbu tennischilarning barchasini 3:0 hisobida dog‘da qoldirdi.
Final ostonasiga dadil odim tashlagan Arujan Kamalova yarim finalda Fransiya terma jamoasi aʼzosi Tanya Moris bilan ro‘baro‘ keldi. Shiddatli va kuchli ruhiy kurashlar ostida o‘tgan o‘yinda tennischimiz mezbonlar vakilini uch partiya natijasiga ko‘ra, 3:2 ko‘rinishida yengishga muvaffaq bo‘ldi.
Finalda esa hindistonlik kichik raketka ustasi Divyanshi Bxoumik bilan kuch sinashdi. Shiddatli o‘tgan o‘yinning 1-turida 11:9, 2-turida 11:3 va 3-turda 11:2 hisobida hindistonlik sportchi foydasiga hal bo‘ldi. Shu tarzda Kamalova xalqaro turnirni kumush medal bilan yakunladi.
15 yoshlilar o‘rtasidagi basʼhlarda ishtirok etgan terma jamoamiz aʼzosi Asel Yerkebayeva dastlab portugaliyalik Djuliya Lealni 3:1 hisobida yenggan bo‘lsa, keyingi bosqichda xitoylik Sinan Sunga imkoniyatni boy berdi. Shunday bo‘lsa-da, turnirdagi yaxshi natijasi tufayli pley-off bosqichida qatnashish huquqiga ega bo‘lgan Aseldan 1/64 final pillapoyasida fransiyalik Jeyd Xayun 3:2 hisobida ustun kelib, 1/32 final sari yo‘l oldi.
Mazkur xalqaro turnir musobaqalari 23 aprelga qadar davom etadi.
Fransiyada o‘tayotgan xalqaro turnir bilan bir vaqtda Belgiyada WTT Youth Contender turniri ham tashkil etilmoqda. Mes shahrida kechayotgan musobaqalarda ishtirokini yakunlagan tennischi qizlarimiz Belgiya turnirida qatnashishga hozirlik ko‘rmoqda.
Shu o‘rinda aytish lozim, o‘tgan yili ushbu turnirlarda qatnashgan stol tennischilarimiz 1 ta oltin va 2 ta bronza medalini qo‘lga kiritgan edi.
