Reuters: Bayden Si Szinpinni diktator deb atadi
Avvalroq Bayden jurnalistlarga Pekin shari qayerda va unda nima borligini bilmasligini aytgandi.
Oq uy rahbari Jo Bayden Xitoy yetakchisi Si Szinpinni diktator deb atadi, deya xabar bermoqda “TASS” Reuters agentligiga tayanib.
Agentlik maʼlumotlariga ko‘ra, AQSH prezidenti Kaliforniyada o‘z saylovoldi kampaniyasi uchun mablag‘ yig‘ish jarayonida ham shunday bayonot bergan. U, shuningdek, Xitoy rahbari 4 fevral kuni AQSH havo hududida urib tushirilgan Xitoy shari qayerda ekani va u avvaldan rejalashtirilgan yo‘nalishdan chetga chiqqani haqida bilmagan bo‘lishi mumkin, dedi.
Avvalroq Bayden jurnalistlarga Pekin shari qayerda va unda nima borligini bilmasligini aytgandi. O‘shanda u tez orada Si Szinpin bilan uchrashishga umid bildirgan.
AQSH Davlat departamenti rahbari Entoni Blinkenning Pekinga tashrifidan so‘ng 19 iyun kuni AQSH prezidenti ikki davlat o‘rtasidagi munosabatlar “to‘g‘ri yo‘lda” ekanini aytdi. U Xitoyda davlat kotibining ishini “beqiyos” deb baholadi. Blinken Pekinga tashrif buyurib, mamlakat rahbariyati vakillari bilan uchrashdi.
