Besh nafar o‘zbekistonlik sportchi JChda ishtirok etadi
Musobaqa Vengriya poytaxti Budapesht shahrida bo‘lib o‘tadi.
19-27-avgust kunlari Vengriyaning Budapesht shahrida yengil atletika bo‘yicha navbatdagi jahon chempionati bo‘lib o‘tadi. Dunyoning eng kuchli atletlari qatnashadigan musobaqada hamyurtlarimiz ham ishtirok etishadi. Butunjahon yengil atletika federasiyasi mazkur dunyo birinchiligida O‘zbekiston terma jamoasining 5 nafar aʼzosi qatnashishini tasdiqladi. Unga ko‘ra, Yekaterina Voronina yetti kurash, Sharifa Davronova uch hatlab sakrash, Anvar Anvarov uzunlikka sakrash, Safina Sadullayeva balandlikka sakrash, Yekaterina Tunguskova marafon yugurish dasturlarida o‘z omadlarini sinab ko‘rishadi. Qayd etish joiz, bellashuvlar davomida sportchilarimiz Parij-2024 normativlarini bajarishsa, Olimpiada yo‘llanmalarini ham qo‘lga kiritishlari mumkin. Yurtdoshlarimiz musobaqada quyidagi sanalarda chiqishadi:
19-avgust: Yekaterina Voronina (100 metrga to‘siqlar osha yugurish, balandlikka sakrash, yadro uloqtirish va 200 metrga yugurish), Sharifa Davronova (saralash);
20-avgust: Yekaterina Voronina (uzunlikka sakrash, nayza uloqtirish, 800 metrga yugurish);
21-avgust: Sharifa Davronova (final);
23-avgust: Anvar Anvarov (saralash);
24-avgust: Anvar Anvarov (final);
25-avgust: Safina Sadullayeva (saralash);
26-avgust: Yekaterina Tunguskova (final);
27-avgust: Safina Sadullayeva (final).
