Tarixdagi eng yuqori ko‘rsatkich: dunyoda qochqinlar soni rekord darajada oshdi
Birgina so‘nggi 9 oyda114 milliondan ortiq odam o‘z uyini tashlab ketishga majbur bo‘lgan.
BMT qochqinlar bo‘yicha agentligi (UNHCR) hisobotida Aytilishicha, 2023 yil boshidan (sentyabr oyi oxirigacha) butun dunyo bo‘ylab 114 milliondan ortiq odam o‘z uyini tashlab ketishga majbur bo‘ldi, bu «xalqaro hamjamiyat mojarolarni hal eta olmaganini ko‘rsatuvchi yangi rekorddir».
Ukraina, Sudan, Kongo Demokratik Respublikasi va Myanmadagi mojarolar, shuningdek, Somalidagi qurg‘oqchilik va suv toshqinlari hamda Afg‘onistonda davom etayotgan gumanitar inqiroz qochqinlar ko‘payishining asosiy omili bo‘lgan.
BMT qochqinlar bo‘yicha Oliy komissari Filippo Grandining aytishicha, hozir dunyoning diqqat markazi G‘azo sektoridagi gumanitar falokatga qaratilgan. Ammo butun dunyo bo‘ylab juda ko‘p mojarolar tarqalmoqda yoki avj olmoqda, beayb odamlar o‘lmoqda yoki o‘z uyini tashlab ketishga majbur bo‘lmoqda.
Uning so‘zlariga ko‘ra, xalqaro hamjamiyat mojarolarni bartaraf eta olmagani yoki yangilarining oldini ololmagani «qochqinlar sonining ortishi va azob-uqubatga duchor bo‘lishiga olib keladi».
Shuningdek, hisobotda, mamlakat ichida ko‘chishga majbur bo‘lganlar qochqinlarning 57 foizini tashkil etishi maʼlum qilingan. Shu bilan birga, chet elga qochib o‘tganlarning aksariyati — 75 foizi past va o‘rta daromadli mamlakatlar tomonidan qabul qilingan. 2023 yilning dastlabki 6 oyida dunyo bo‘ylab 1,6 million kishi boshpana so‘rab murojaat qilgan, bu tarixdagi eng yuqori ko‘rsatkichdir.
