To‘qayev yangi prezidentlik muddatiga saylanishi mumkinligi haqidagi savolga javob berdi

Qozog‘iston Prezidenti Qosim-Jo‘mart To‘qayev yangi Konstitutsiya kuchga kirgani ortidan yana prezidentlikka saylanish huquqiga ega bo‘ldi. Davlat rahbarining o‘zi esa 2029-yilgi saylovda ishtirok etishi yoki muddatidan oldin saylov o‘tkazilishi mumkinligi haqidagi savolga hozircha javob berishga erta ekanini aytdi.

 

Jurnalist To‘qayevdan 2029-yilgi prezidentlik saylovida o‘z nomzodini ilgari surish huquqidan foydalanadimi yoki muddatidan oldin saylov o‘tkaziladimi, deb so‘radi.

 

“Konstitutsiyaviy sud shunday qaror qabul qildi. Bu qonuniy va men qayta saylanish huquqiga egaman. Ammo bo‘lajak saylovlarga kelsak, siz aytganingizdek, qaysi yilda saylovda ishtirok etaman yoki etmayman — bu haqda gapirishga hali erta”, — dedi To‘qayev.

 

U buni mamlakat oldida hali bajarilishi lozim bo‘lgan ko‘plab vazifalar borligi bilan izohladi. Prezident, xususan, Qozog‘istonni keng ko‘lamli qurilish maydoniga aylantirish, birinchi navbatda, fuqarolar uchun ijtimoiy obyektlar barpo etish zarurligini ta’kidladi.

 

To‘qayev bu maqsadlarda Milliy jamg‘arma mablag‘laridan foydalanishga tayyorligini bildirdi.

 

“Nega biz pulni xorijdagi qimmatli qog‘ozlarda ushlab turishimiz kerak? Uni xalq farovonligi uchun ishlatish mumkin-ku. Men bu pullarni shunchaki saqlab o‘tirishga qarshiman. Ular xalqimiz va fuqarolarimizga xizmat qilishi kerak”, — dedi Qozog‘iston rahbari.

 

U dunyodagi vaziyat murakkabligicha qolayotganini, xalqaro sharoit mamlakatdan doimiy tahlil va e’tibor talab qilayotganini qayd etdi. Shunga qaramay, Qozog‘istonda ichki tinchlik va barqarorlikni ta’minlashga erishilganini aytdi.

 

To‘qayev mamlakatda iqtisodiy o‘sish mavjudligini ham ta’kidladi. Uning so‘zlariga ko‘ra, bu ko‘rsatkich obyektiv bo‘lib, asosiy xalqaro moliyaviy institutlar tomonidan ham tasdiqlangan.

 

Prezident prezidentlik saylovida ishtiroki bo‘yicha kelasi yili aniqroq javob berishi mumkinligini bildirdi.

 

Ma’lumot uchun, Qozog‘istonda yangi Konstitutsiya 1-iyuldan kuchga kirgan. Mart oyida o‘tkazilgan referendumda uning loyihasi qariyb 90 foiz ovoz bilan ma’qullangan.

 

Yangi Konstitutsiya mamlakat siyosiy tizimiga qator o‘zgarishlar kiritdi. Xususan, ikki palatali parlament — Senat va Majlis o‘rniga bir palatali Qurultoy tashkil etildi, vitse-prezident lavozimi qayta joriy qilindi hamda yangi maslahat organi — Xalq kengashi tashkil etilishi belgilandi.

 

Yangi Konstitutsiya amaldagi prezident Qosim-Jo‘mart To‘qayevga yana bir bor prezidentlik saylovida qatnashish imkonini berdi. Konstitutsiyaviy sud ham uning qayta saylanish huquqiga ega ekanini tasdiqlagan.