Saudiya Arabistoni Jabaliya lageriga qilingan hujumni keskin qoraladi
G‘azoda sog‘liqni saqlash vazirligi hujumda 50 dan ortiq odam halok bo‘lgani, 150 dan ortiq kishi jarohatlanganini maʼlum qildi.
Qizil Yarim Oy jamiyati maʼlumotlariga ko‘ra, Saudiya Arabistoni Tashqi ishlar vazirligi Isroil armiyasining kecha G‘azo shahridagi Jabaliya qochqinlar lageriga uyushtirgan hujumini qoraladi. G‘azoda sog‘liqni saqlash vazirligi hujumda 50 dan ortiq odam halok bo‘lgani, 150 dan ortiq kishi jarohatlanganini maʼlum qildi.
"Saudiya Arabistoni Podshohligi isroillik bosqinchi kuchlarining qamalda qolgan G‘azo sektoridagi Jabaliya qochqinlar lageriga ko‘p sonli begunoh fuqarolarning o‘limi va jarohatlanishiga olib kelgan g‘ayriinsoniy hujumini keskin qoralaydi", — deyiladi Saudiya Arabistoni Tashqi ishlar vazirligi bayonotida.
Tashqi ishlar vazirligi "bosqinchi kuchlar" deb atagan Isroil armiyasini aholi zich joylashgan hududlarga hujum qilish bilan xalqaro huquqni buzganlikda aybladi.
"Bu hodisa xalqaro hamjamiyat Isroil bosqinchi kuchlariga zudlik bilan o‘t ochishni to‘xtatish va gumanitar sulhga rozi bo‘lish uchun bosim o‘tkaza olmagani tufayli sodir bo‘ldi", — deyiladi bayonotda.
Isroil armiyasining tushuntirishicha, Jabaliyaga qilingan hujumda HAMAS qo‘mondonlaridan biri va yer osti tunnellari nishonga olingan hamda yaqin atrofdagi turar-joy binolari ularning ostidagi tunnellar qulagani oqibatida vayron bo‘lgan.
