Rossiya Liviyada harbiy-dengiz bazasi qurish niyatida
Bu mamlakatga Yevropani yaqindan nazorat qilish imkonini beradi.
Amerika nashrining yozishicha, Rossiya va Liviya harbiy hamkorlik bo‘yicha kelishuv ustida ish boshlagan. Harakat general Xalifa Xaftarning 28-sentabr kuni Moskvada Rossiya prezidenti Vladimir putin bilan uchrashganidan keyin boshlangani aytilmoqda.
Xaftar Rossiya Federatsiyasiga bir qancha havo bazalari va Rossiya harbiy kemalariga Tobruk portida doimiy joylashish huquqini berishga tayyorligi maʼlum qilingan.
Taʼkidlanishicha, Xaftar Afrikadagi neft zaxiralarining taxminan 40 foiziga ega bo‘lgan mamlakatdagi ko‘plab yirik neft obyektlarini nazorat qiladi. Unga havo hujumidan mudofaa tizimlari, qiruvchi uchuvchilarni tayyorlash va hukumat kuchlariga qarshi turish uchun maxsus kuchlar kerak. Buning evaziga hozirda "Vagner" PMC harbiylashtirilgan tuzilmalari joylashgan bir nechta havo bazalari Rossiya qo‘shinlarini joylashtirish uchun berilishi vaʼda qilingan.
"Bu holda, Rossiya kemalari Gretsiya va Italiyadan doimiy ravishda bir necha yuz kilometr uzoqlikda bo‘ladi va bu Rossiyaga butun Yevropa Ittifoqiga josuslik qilish imkonini beradi", — dedi AQSHning Liviya bo‘yicha sobiq maxsus vakili Jonatan Vayner nashrga.
Uning so‘zlariga ko‘ra, Qo‘shma Shtatlar tahdidni juda jiddiy qabul qiladi va shu paytgacha Rossiya Federatsiyasini O‘rtayer dengizi mintaqasidan uzoqlashtirishga harakat qilgan.
