Qozog‘istonda mamlakat tarixidagi ilk Qurultoy uchun saylov boshlandi
Saylovda jami 12 605 788 nafar fuqaro ishtirok etishi kutilmoqda.
Qozog‘istonda mamlakat tarixidagi ilk Qurultoy uchun saylov jarayoni boshlandi. Bu haqda Tengrinews.kz ma’lum qildi.
Mahalliy vaqt bilan soat 07:00 holatiga ko‘ra, respublikaning 20 ta hududidagi 10 363 ta saylov uchastkasida ovoz berish boshlandi. Yana 107 ta uchastka hududiy komissiyalar qaroriga ko‘ra, soat 06:00 dan faoliyat yuritgan. Shuningdek, 16 ta xorijiy davlatda tashkil etilgan 19 ta saylov uchastkasi ham fuqarolarni qabul qilmoqda. Saylovda jami 12 605 788 nafar fuqaro ishtirok etishi kutilmoqda.
Qozog‘istonda 1-iyuldan yangi Konstitutsiya kuchga kirgan. Uning loyihasi mart oyida o‘tkazilgan referendumda qariyb 90 foiz ovoz bilan ma’qullangan. Yangi Konstitutsiya amaldagi prezident Qosim-Jo‘mart To‘qayevga yana bir bor prezidentlik saylovida ishtirok etish imkonini beradi.
Mamlakatning ikki palatali parlamenti — Senat va Majlis 30-iyun kuni o‘z faoliyatini rasman yakunlagan. Konstitutsiyaviy islohot natijasida ikki palatali parlament o‘rniga bir palatali Qurultoy tashkil etiladi.
Shuningdek, islohot doirasida vitse-prezident lavozimi qayta tiklanadi va yangi maslahat organi — Xalq kengashi tashkil etiladi. Uning a’zolari prezident tomonidan tayinlanadi.
