Yaqin Sharqda urush boshlanganidan beri 48 jurnalist halok bo‘ldi
Bu haqda Jurnalistlarni himoya qilish qo‘mitasi maʼlum qildi.
Jurnalistlarni himoya qilish qo‘mitasi (CPJ) Isroil va HAMAS o‘rtasidagi urush boshlanganidan beri 48 nafar ommaviy axborot vositalari xodimi o‘z xizmat vazifalarini bajarish chog‘ida halok bo‘lganini maʼlum qildi.
Nodavlat notijorat tashkilotga ko‘ra, jurnalistlar uchun eng halokatli kun urushning birinchi kuni – 7 oktabr kuni HAMAS jangarilari Isroilga hujum qilgan kun bo‘lgan va o‘shanda 6 jurnalist halok bo‘lgan. O‘tgan shanba, 18 noyabr kuni esa 5 kishi halok bo‘lgan.
“G‘azodagi jurnalistlar Isroilning quruqlikdagi hujumi chog‘ida mojaroni yoritishga urinayotganda, xususan, Isroilning halokatli havo hujumlari, aloqa uzilishi, taʼminot taqchilligi va keng tarqalgan elektr taʼminotidagi uzilishlar kabi xavf-xatarlarga duch kelishmoqda”, — deb bayonot berdi tashkilot.
SPJ maʼlumotlariga ko‘ra, halok bo‘lgan 48 jurnalist va OAV xodimlari orasida 43 nafari falastinlik, 4 nafari isroillik va 1 nafari livanlikdir. 9 nafar jurnalist jarohatlangan, 3 nafari bedarak yo‘qolgan, 13 nafari hibsga olingan.
“SPJ jurnalistlar inqiroz paytida muhim ishlarni bajaradigan tinch aholi ekani va urushayotgan tomonlar tomonidan nishonga olinmasligi kerakligini taʼkidlaydi. Butun mintaqadagi jurnalistlar ushbu yurakni ranjituvchi mojaro haqida xabar berib, katta qurbonlik qilmoqdalar”, — deya qo‘shimcha qildi tashkilot.
