Finlyandiya va Rossiya o‘rtasidagi chegara deyarli butunlay yopildi
Ayni paytda chegarani kesib o‘tmoqchi bo‘lgan bir necha yuz muhojir yopilgan nazorat-o‘tkazish punktida to‘planib qolgani aytilmoqda.
Mamlakatlar o‘rtasidagi aloqa uchun Murmanskdan 200 kilometr uzoqlikda joylashgan eng shimoliy va borish qiyin bo‘lgan «Raya-Jooseppi» chegara punkti ochiq qoldirildi. Ayni paytda chegarani kesib o‘tmoqchi bo‘lgan bir necha yuz muhojir allaqachon yopilgan Salla nazorat-o‘tkazish punktida to‘planib qolgani xabar qilinmoqda.
Finlyandiyaning daʼvo qilishicha, Rossiya hukumati qochqinlar oqimini ataylab nazorat qilib, ularni chegara tomon jo‘natib yubormoqda. Rossiya esa bu ayblovlarni rad etdi. Estoniya ham Rossiya bilan chegaralarini yopib qo‘yishga tayyorgarlik ko‘ra boshladi. Juma kuni Narva ko‘prigida “ajdar tishlari” deb nomlanuvchi 15 ta qo‘shimcha to‘siq o‘rnatildi. Politsiya Narvadagi nazorat-o‘tkazish punkti yaqin orada yopilishi mumkinligini istisno qilmayapti.
Norvegiya Rossiya Federatsiyasi bilan chegarada hozircha hech qanday qoidabuzarlik qayd etilmaganini, ammo muhojirlar oqimi tufayli xavfsizlikni taʼminlash uchun zarur choralarni ko‘rishi mumkinligini aytmoqda. Bu haqda bosh vazir Yonas Gahr Styor maʼlum qildi. Bosh vazir Norvegiya Finlyandiya-Rossiya chegarasidagi vaziyatni kuzatib borayotganini va bu masala bo‘yicha Finlyandiya va Estoniya bilan aloqada ekanligini taʼkidlagan.
