Janubiy Koreya 165 ming muhojirga mehnat vizalari berish niyatida
Mamlakatga 16 davlat, xususan, O‘zbekistonga ham E-9 vizasi "eshiklarini ochmoqda".
Koreya kelgusi yili ko‘plab sohalarda ishchi kuchi yetishmovchiligi kuchayib borayotgani sababli Mehnatga ruxsat berish tizimi (EPS) bo‘yicha rekord darajadagi 165 ming mehnat muhojirini jalb qiladi.
Hukumat, shuningdek, E-9 vizasiga ega xorijiy ishchilar ishlashi mumkin bo‘lgan sohalarni kengaytirib — restoran, tog‘-kon sanoati va o‘rmon xo‘jaligini ham qo‘shadi.
E-9 vizasi mehnatga ruxsatnoma tizimi (Employment Permit System - EPS) orqali qo‘lda va kasbiy bo‘lmagan ish bilan shug‘ullanishni istagan ishchilarga beriladi. Ushbu vizani 16 davlat, jumladan Qirg‘iziston va O‘zbekiston fuqarolari olishlari mumkin.
Ishlab chiqarishda E-9 vizasi egalarining eng ko‘p soni — 95 000 ta, qishloq xo‘jaligi va chorvachilikda — 16 000 ta, xizmatlar ko‘rsatish sohasida — 13 000 ta, baliqchilikda — 10 000 ta, qurilishda — 6 000 ta va kemasozlikda — 5 000 ta bo‘ladi, qolgan 20 000 viza sohasidan qatʼi nazar taqsimlanadi, deb qo‘shimcha qildi vazirlik.
Janubiy Koreyaga E-9 vizasi bilan kirgan muhojirlar soni 2021 yilda 52 ming va 2022 yilda 69 ming bo‘lgan bo‘lsa, joriy yilda 120 mingga yetdi.
