AQSh Suriyani terrorizmni qo‘llab-quvvatlovchi davlatlar ro‘yxatidan chiqardi
Endi ro‘yxatda Kuba, Eron va Shimoliy Koreya qolmoqda.
AQSh 24-avgust kuni Suriyani terrorizmni qo‘llab-quvvatlovchi davlatlar ro‘yxatidan rasman chiqardi. Mazkur maqom Suriya uchun 1979-yildan buyon amal qilib kelayotgan edi. Bu haqda AQSH Moliya vazirligi xabar berdi.
Qaror AQSh prezidenti Donald Trampning iyul oyidagi bildirishnomasi va Kongressdagi 45 kunlik ko‘rib chiqish jarayonidan so‘ng kuchga kirgan.
AQSh davlat kotibi Marko Rubioning ta’kidlashicha, qaror Suriya yangi hukumatining terrorizm bilan aloqalarni uzish va mamlakatni xalqaro terrorchilik harakatlaridan uzoqlashtirish borasidagi majburiyatlari hamda ijobiy qadamlaridan kelib chiqib qabul qilingan.
Qaror Suriya iqtisodiyotiga xalqaro investitsiyalarni jalb qilish yo‘lidagi muhim to‘siqlardan birini olib tashlaydi. Reuters ma’lumotiga ko‘ra, bu o‘zgarish AQSh moliyaviy institutlarining Suriya banklari bilan ishlashi uchun ham imkoniyatlarni kengaytiradi, biroq sanksiyalangan shaxslar bilan operatsiyalarga cheklovlar saqlanib qoladi.
Shuningdek, AQSh Suriya hukumatining terrorizmga qarshi majburiyatlari fonida “Hay’at Tahrir ash-Shom” (HTS)ga nisbatan qo‘llangan ayrim terrorizmga qarshi cheklovlarni ham bekor qildi.
Suriya 1979-yilda AQShning terrorizm homiylari ro‘yxatiga kiritilgan edi. Endilikda ushbu ro‘yxatda Kuba, Eron va Shimoliy Koreya qolmoqda.
