Zelenskiy YI rahbarlarini Yevropaga nisbatan ishonchga "xiyonat qilmaslikka" chaqirdi

 

Zelenskiy bu haqda Ukrainaning Yevropa Ittifoqiga aʼzo bo‘lishi va unga 50 milliard yevro ajratish masalasi ko‘rib chiqilayotgan sammitda videokonferensiya orqali qilgan nutqida aytdi.

 

"Bu kun tarixda qoladi. Biz uchun yaxshi yoki yomon bo‘ladimi, tarixda hammasi qayd etiladi. Har bir so‘z, har bir qadam, har bir harakat va harakatsizlik. Kim nima uchun kurashgani. Yevropa qatʼiyatsizlikka tushib qolmasligi juda muhim. Bugun hech kim Yevropani ishonchsiz yoki o‘zi tayyorlagan qarorlarni qabul qilishga qodir emas deb hisoblanishini istamaydi", — deya Zelenskiyning so‘zlaridan iqtibos keltiradi The Guardian.

 

Uning fikricha, Ukraina Yevroittifoqqa aʼzo bo‘lish uchun zarur shartlarni bajargan.

 

"Biz vaʼda qilingan yechim haqida gapiryapmiz. Men hech qanday qarshi dalillarni eshitmadim, nega biz butun Yevropa kelishib olgan rejani amalga oshirmaymiz? O‘tgan yili Ukraina qanday qilib oldinga harakat qilish bo‘yicha aniq tavsiyalar oldi. Asosiy qonunlar qabul qilindi. Hammangiz biz barcha majburiyatlarni bajarganimizni yaxshi bilasiz", — deya taʼkidladi Ukraina Prezidenti.

 

U Yevropani o‘z vaʼdalarini bajarishga chaqirdi.

 

"Bugun sizdan bir narsani so‘rayman, xalqqa va ularning Yevropaga ishonchiga xiyonat qilmang. Agar Yevropaga hech kim ishonmasa, Ittifoqning omon qolishiga nima yordam beradi? Agar Moskva Bryusseldan Ukrainaga nisbatan salbiy munosabatga ishora olsa, bundan Yevropadagilar hech qanday foyda ko‘rmaydi. Ukraina bilan bog‘liq vaziyatdan Putin, ehtimol, shaxsan sizga va butun Yevropaga qarshi foydalanadi. Unga ushbu yildagi birinchi va yagona g‘alabasini qozonishiga imkon bermang. Yevropa g‘alaba qozonishi kerak, kelishuvlar hurmat qilinishi kerak, va so‘zlar ahamiyatli bo‘lishi kerak", — deya qo‘shimcha qildi Zelenskiy.