Qatar bilan 2024-2026-yillarga mo‘ljallangan Harakatlar rejasi imzolandi

 

Xabar berganimizdek, shu kunlarda huquqni muhofaza qiluvchi organlar, shuningdek, Korrupsiyaga qarshi kurashish agentligi rahbariyati va mas’ul xodimlaridan iborat O‘zbekiston Respublikasi delegatsiyasi Qatar davlatida bo‘lib turibdi. Tashrif dasturiga muvofiq, bugun Agentlik direktori A.Burxanov Qatar davlatining Ma’muriy nazorat va shaffoflik idorasi prezidenti Xamad ben Naser Al Misned bilan uchrashdi. Uchrashuv mobaynida o‘zaro hamkorlik memorandumi doirasida 2024-2026 yillarga mo‘ljallangan Harakatlar rejasi imzolandi. Reja tomonlar o‘rtasida korrupsiyaviy xavf-xatarlarni baholash, davlat idoralari faoliyati ochiqligini ta’minlash hamda BMT aksilkorrupsiya standartlarini milliy amaliyotga tatbiq etishda muntazam va yaqindan tajriba almashish kabi masalalarni o‘z ichiga oladi. Jumladan, quyidagilar Harakatlar rejasining asosiy yo‘nalishlari sifatida belgilandi: - Korrupsiyaga qarshi kurashishni tartibga soluvchi qonunchilikni takomillashtirish bo‘yicha takliflar ishlab chiqish; -Davlat xizmatida korrupsiyaviy xavf-xatarlarni baholash va faoliyat ochiqligini ta’minlash bo‘yicha tajriba almashish; - Sport sohasida halollik va shaffoflikni ta’minlash bo‘yicha o‘zaro hamkorlik qilish; - Agentlikning e-antikor platformasini takomillashtirishda Qatar davlati tajribasini o‘rganish. Muloqot yakunida muhokama qilingan hamkorlik yo‘nalishlarida ishlarni jadallashtirishga kelishib olindi.