Istanbuldagi cherkovga qilingan hujumda Rossiya va Tojikiston fuqarolari gumonlanmoqda
Turk politsiyasi xodimlari 30 ta manzilda tintuv o‘tkazgan, hujumga aloqadorlik gumoni bilan jami 47 kishi qo‘lga olingan.
Istanbuldagi katolik cherkovida sodir etilgan otishmada gumon qilingan ikki shaxs qo‘lga olindi. Bu haqda Turkiya Ichki ishlar vazirligi rahbari Ali Erlikaya xabar berdi.
IIV rahbarining so‘zlariga ko‘ra, bular Tojikiston va Rossiya fuqarolari. Taxminlarga ko‘ra, ular ISHID terrorchilik tashkilotiga aloqador. Avvalroq ushbu guruh hujum uchun javobgarlikni o‘z zimmasiga olgandi.
Turk politsiyasi xodimlari 30 ta manzilda tintuv o‘tkazgan, hujumga aloqadorlik gumoni bilan jami 47 kishi qo‘lga olingan.
Eslatib o‘tamiz, 28-yanvar kuni tushdan keyin Istanbulning Sariyer tumanidagi Avliyo Maryam katolik cherkoviga niqobli ikki kishi hujum qildi. Ular o‘t ochishgan, so‘ng voqea joyidan qochib ketishgan. Otishmada Tursen Jihan ismli Turkiya fuqarosi vafot etdi.
Istanbul gubernatori Dovut Gul va Turkiya prezidenti Rajab Toyyib Erdo‘g‘on voqea munosabati bilan hamdardlik bildirdi. Rim papasi Fransisk hujumni qoraladi. Istanbulning Lotin katolik jamiyati yepiskopi Massimiliano Palinuro shahar hokimiyatini “adolatni tiklashga, voqea yuzasidan tergov va haqiqatni oshkor qilishga chaqirdi.
