Tanzila Norboyeva Shveysariya Konfederatsiyasi prezidenti bilan muzokara o‘tkazdi
Bu haqda Senat matbuot xizmati xabar berdi.
Oliy Majlis Senati raisi Tanzila Norboyeva Nyu-York shahrida Shveysariya Konfederatsiyasi prezidenti Viola Amerd bilan uchrashuv o‘tkazdi.
Maʼlum qilinishicha, uchrashuvda O‘zbekiston va Shveysariya hamkorligini izchil kengaytirish, shu jumladan, siyosiy muloqotni rivojlantirish, savdo-iqtisodiy, sarmoyaviy va texnologik sohalarda qo‘shma loyihalarni amalga oshirish masalalari muhokama qilingan.
Ayni paytda Shveysariya bilan avtomobilsozlik, to‘qimachilik, farmatsevtika, oziq-ovqat sanoati, chorvachilik, infratuzilma sohalarida 19 ta qo‘shma loyiha amalga oshirilmoqda. Uchrashuv davomida mazkur ko‘rsatkichni bir necha barobar oshirish uchun ikkala davlatda ham katta salohiyat va keng imkoniyatlar mavjudligi taʼkidlangan.
O‘zaro munosabatlarda parlamentlararo aloqalarning muhimligidan kelib chiqib, mazkur yo‘nalishdagi hamkorlik istiqbollari ham ko‘rib chiqildi. Xususan, ixtisoslashtirilgan qo‘mitalar darajasida aloqalarni faollashtirish, ikki davlat parlamentlarida do‘stlik guruhlarini tashkil etish yuzasidan fikr almashilgan.
Shuningdek, uchrashuv davomida qator sohalarda hamkorlikni rivojlantirish yuzasidan amaliy takliflar ham ilgari surilgan. Xususan, gender tenglik sohasida hamkorlikni rivojlantirish, mazkur yo‘nalishda o‘zaro tajriba almashish muhimligi qayd etilgan.
Orol dengizi mintaqasidagi vaziyatni yaxshilash yuzasidan ijtimoiy ahamiyatga molik dasturlarni amalga oshirishda moliyaviy va texnik hamkorlikni kengaytirish masalalari ham tomonlarning diqqat markazida bo‘lgan.
