“Kelishuv bo‘lmasa, Eronni yo‘q qilamiz”: Tramp BMTda Eron haqida gapirdi

AQSh prezidenti Donald Tramp BMT Bosh Assambleyasidagi nutqida Eron bilan urushni to‘xtatish bo‘yicha kelishuvga erishilmasa, mamlakatga qarshi harbiy amaliyotlarni davom ettirishi va Eronni yo‘q qilishi mumkinligini aytdi.

 

Trampning ta’kidlashicha, AQShning Eronga qarshi harakatlari Tehronning yadro quroliga ega bo‘lishining oldini olishga qaratilgan. U boshqa davlatlarni ham Eronni iqtisodiy jihatdan yakkalashga va uni muzokaraga majbur qilishga chaqirdi.

 

«Men muhim qaror qabul qilishim kerak. Eron bilan kelishuvga erishiladimi va bu kelishuv ularga qayta tiklanib, avvalgidan ham kuchliroq davlatga aylanish imkonini beradimi? Yoki men Islom Respublikasini tezda yo‘q qilamanmi?» — dedi Tramp.

 

AQSh prezidenti Eron bilan tinchlik kelishuviga erishish mumkinligini aytar ekan, bunday bitim noyabr oyida bo‘lib o‘tadigan Kongress saylovlaridan keyin tuzilishini kutayotganini bildirdi.

 

Tramp, shuningdek, AQShning G‘arbiy yarimshardagi harbiy ustunligini himoya qildi. U Venesuelaga nisbatan olib borilayotgan siyosatni AQSh o‘z hududiga yaqin joylarda xorijiy tahdidlarga yo‘l qo‘ymasligining isboti sifatida ko‘rsatdi.

 

BMTdagi nutqida Tramp Meksika va Kubaga nisbatan AQSh siyosatiga ham to‘xtaldi. U Meksikani kartel zo‘ravonligining markazi deb atab, mamlakat hukumatini o‘z hududi ustidan nazoratni qayta tiklashga chaqirdi. Kuba masalasida esa Vashington mamlakatdagi vaziyatni tubdan o‘zgartirishga intilayotganini aytdi.

 

Tramp BMTni ham tanqid qilib, tashkilotdagi byurokratiyani qisqartirish bo‘yicha AQSh amalga oshirayotgan ishlarni tilga oldi. Shuningdek, u Xalqaro jinoiy sud AQSh harbiy xizmatchilariga nisbatan yurisdiksiyaga ega emasligini ta’kidladi.

 

Trampning BMTdagi chiqishi AQSh kuchlari Erondagi ikki zarbada harbiy jinoyatlar sodir etgan bo‘lishi mumkinligi haqidagi BMT faktlarni aniqlash missiyasi bayonotidan bir necha kun o‘tib amalga oshirildi. 

 

Missiya zarbalardan biri Eron janubidagi Minab shahridagi qizlar maktabiga tekkanini bildirgan.

 

Nutqidan so‘ng Tramp 11 dan ortiq davlat rahbarlari va yuqori martabali vakillar bilan uchrashishi rejalashtirilgan. Ular orasida Ukraina prezidenti Volodimir Zelenskiy, Venesuelaning muvaqqat rahbari Del­si Rodriges hamda Fors ko‘rfazi davlatlari — BAA, Saudiya Arabistoni, Ummon, Bahrayn, Kuvayt va Qatar vakillari bor.