Yevropa Ittifoqi Rossiyaga qarshi sanksiyalarni uzaytiradi: Alisher Usmonov ro‘yxatdan chiqariladi
Qaror Latviya avvalgi e’tirozidan voz kechib, ovoz berishda betaraf qolganidan so‘ng ma’qullangan.
Yevropa Ittifoqi davlatlari Rossiyaga qarshi amaldagi sanksiyalarni uch yilga uzaytirishga kelishdi. Shu bilan birga, rossiyalik milliarderlar Alisher Usmonov va Mixail Fridman sanksiyalar ro‘yxatidan chiqariladi.
Bu qarorga Latviya avvalgi e’tirozidan voz kechib, ovoz berishda betaraf qolganidan so‘ng kelingan. Yevropa Ittifoqida sanksiyalarni joriy etish yoki uzaytirish uchun barcha a’zo davlatlarning roziligi talab qilinadi.
Avval Rossiyaga qarshi sanksiyalar har olti oyda qayta ko‘rib chiqilar edi. Yangi kelishuvga ko‘ra, ro‘yxatdagi qolgan qariyb 3 ming nafar jismoniy va yuridik shaxsga nisbatan cheklovlar uch yilga uzaytiriladi.
Qaror «yozma tartib» deb ataladigan jarayon yakunlangach, rasman qabul qilinadi.
Sentyabr boshida Fransiya Usmonovni Yevropa Ittifoqi sanksiyalar ro‘yxatidan chiqarishni taklif qilgan. Parij bunga milliy xavfsizlik bilan bog‘liq xavotirlarni sabab sifatida ko‘rsatgan.
Keyinchalik Lyuksemburg ham Fridmanga nisbatan xuddi shunday chorani qo‘llashni talab qilgan. Fridman Lyuksemburgga qarshi 16 milliard dollarlik da’vo kiritgan.
