Terma jamoa to'liq tarkibda Parijga boradi
Ayni kunlarda Xitoyning Tayyan shahrida taekvondo WT bo‘yicha Osiyo litsenzion turniri o‘tkazilmoqda.
Musobaqada O‘zbekiston milliy terma jamoasining ikki nafar a’zosi — Jasurbek Jaysunov (-80 kg) va Ozoda Sobirjonova (-67 kg) ishtirok etdi.
Quvonarlisi, har ikki sportchi o‘z janglarida g‘alaba qozonib, to‘rt yillikning eng muhim kompleks musobaqasi uchun litsenziyani qo‘lga kiritdi. Qayd etilishicha, Xitoydagi musobaqadan so‘ng milliy terma jamoadagi yo‘llanmalar soni to‘liq bo‘ldi - 4 ta. Bu natija Tokio-2020 Olimipiya o‘yinlarida ham sodir bo‘lgandi.
Ma'lumot uchun, Olimpiya o‘yinlari dasturiga ko'ra, taekvondo WT sport turida ayollar va erkaklar 4 tadan vazn toifasida ishtirok etadi. Har bir mamlakat federatsiyasi o‘z ixtiyoriga ko‘ra ayollar va erkaklar orasidan 2 tadan vazn toifasida yo‘llanmalar uchun qatnashish imkoniyatiga ega bo‘ladi.
Avvalroq terma jamoaning ikki nafar a’zosi — Ulug‘bek Rashitov (-68 kg) hamda Svetlana Osipova (+67 kg) reyting ochkolari orqali Parij-2024 chiptasiga ega chiqqan edi. Shu tariqa, Parij-2024 XXXIII yozgi Olimpiya o'yinlarida terma jamoa to'liq tarkibda ishtirok etadigan bo'ldi:
-68 kg: Ulug'bek Rashitov
-80 kg: Jasurbek Jaysunov
-67 kg: Ozoda Sobirjonova
+67 kg: Svetlana Osipova.
