"Navbahor" klubi prezidenti iste’foga chiqdi
U jamoada bir oy ham ishlamadi.
Mart oyi boshida "Navbahor" futbol klubi prezidenti sifatida tanishtirilgan Rasul Nizomboyev klubda bir oy ham ishlamay, jamoani tark etdi. Namangan klubi matbuot xizmati xabariga ko‘ra, Nizomboyev "sog‘ligidagi muammolar sababli" ishdan ketgan.
"Navbahor" uy uchrashuvlarini o‘tkazadigan "Markaziy" stadionida yig‘ilish o‘tkazildi. Uni Namangan shahar, Davlatobod tumani hokimi Anvarjon Tojimirzayev olib bordi.
Yig‘ilishda tashkiliy masala ko‘rildi. "Navbahor" PFK prezidenti Rasul Nizambayev sog‘ligidagi muammolar sababli, o‘z arizasiga binoan iste’foga chiqqani ma’lum qilindi", - deyiladi klub xabarida.
Qayd etilishicha, Baxtiyor Nurmatov yana "Navbahor" klubi bosh direktori lavozimiga qaytgan. Bungacha ushbu lavozimda faoliyat yuritgan Akmal Sohibov esa direktor o‘rinbosari vazifasini bajaruvchi lavozimida ishlaydigan bo‘ldi.
