Xususiy maktab va bog‘chalar soliqlardan ozod qilinadi
Bu bo‘yicha prezident qarori qabul qilindi.
“Taʼlim sohasida xususiy sektor ishtirokini oshirish bo‘yicha qo‘shimcha chora-tadbirlar to‘g‘risida”gi Prezident qarori qabul qilindi.
Qaror bilan 2030 yil 1 yanvarga qadar nodavlat maktabgacha va umumiy o‘rta taʼlim tashkilotlari barcha turdagi soliq (bundan ijtimoiy soliq mustasno) va yig‘imlardan ozod qilinadi.
Unda mehnat faoliyatini amalga oshirayotgan chet ellik o‘qituvchi va mutaxassislar jismoniy shaxslardan olinadigan daromad solig‘i va ijtimoiy soliq to‘lamaydi.
Shuningdek, 2030 yil 1 yanvarga nodavlat maktabgacha va umumiy o‘rta taʼlim tashkilotlarining quyidagi O‘zbekiston Respublikasida ishlab chiqarilmaydigan tovar jihozlariga bojxona to‘lovlari to‘lanmaydi (bojxona rasmiylashtiruvi uchun yig‘imlar bundan mustasno):
— zamonaviy o‘quv va laboratoriya uskunalari;
— kompyuter texnikasi va dasturiy mahsulotlar;
— o‘quv va ilmiy-metodik adabiyotlar, anjomlar va moddiy-texnik resurslar.
2025 yil 1 yanvardan boshlab nodavlat taʼlim tashkilotlariga doimiy jalb etiladigan pedagog xorijiy mutaxassislarga “A-2” o‘qituvchilar kirish vizalarini berish yo‘lga qo‘yiladi.
Davlat va nodavlat taʼlim tashkilotlari tomonidan xorijdan jalb qilingan mutaxassislarga mehnat qilish huquqini beruvchi tasdiqnoma berish yig‘im miqdori BHMning 30 baravaridan 1 baravarigacha kamaytiriladi.
