“G‘amxo‘rlik” guruhlari onalar uchun ko‘makchi
Ularda nogironligi bo‘lgan bolalar tarbiyalanib kelmoqda.
Nargiza opa Sattorova 14 yil oldin ilk marotaba onalik baxtini tuydi. Ammo, uning bosh farzandi Sardorbek Samiyev nogironlik bilan tug‘ilgan edi. Farzandini ham, uning nuqsonini ham neʼmat sifatida qabul qilgan qahramonimiz o‘tgan yillar davomida bolasini ko‘z qorachig‘ida asrab-avaylab, parvarishladi. Jamiyatda uzilib bo‘lsada, bor mehrini berdi.
Yurtboshimizning talab va takliflariga binoan tashkil etilgan “G‘amxo‘rlik” guruhi haqidagi xabarni Sardorbekning oilasi katta quvonch bilan kutib oldi. Bola ham ushbu guruhga mehr qo‘ydi. Onasi Nargiza opa esa har tongda farzandini guruh tarbiyachilari - ishonchli qo‘llarga topshirib, o‘zining tadbirkorlik ishlari bilan shug‘ullanish, shuningdek, psixolog xizmatidan foydalanish imkoniga ega bo‘ldi.
Maʼlumot o‘rnida shuni alohida taʼkidlash mumkinki, viloyatda jami 2 ta ixtisoslashtirilgan maktab-internatida “G‘amxo‘rlik” guruhi tashkil etilgan bo‘lib, ularda 15 nafar nogironligi bo‘lgan bolalar tarbiyalanib kelmoqda. 2025 yilda ushbu ko‘rsatkich 34 nafarga yetkazilishi ko‘zda tutilgan.
