O‘zbekistonda ish haqi oshdi: o‘rtacha maosh 7,1 mln so‘mga yetdi

O‘zbekistonda 2026-yilning yanvar–iyun oylarida nominal ish haqi o‘tgan yilning mos davriga nisbatan 18,4 foizga, real ish haqi esa 10,9 foizga oshdi. Bu haqda Markaziy bankning 2026-yil II choragi bo‘yicha Mehnat bozori sharhida ma’lum qilindi.

 

Qayd etilishicha, real ish haqining 10,9 foizga o‘sishi so‘nggi yillardagi eng yuqori ko‘rsatkich bo‘lgan. Markaziy bank buni, asosan, narxlar o‘sishining sekinlashishi bilan izohlagan.

 

Hududlar kesimida real ish haqining eng yuqori o‘sishi Jizzax viloyatida qayd etilgan — 13,3 foiz. Namangan viloyatida bu ko‘rsatkich 11,8 foizni, Toshkent shahrida esa 10,7 foizni tashkil etgan.

 

Real ish haqining eng past o‘sishi Andijon viloyati — 7,9 foiz va Qoraqalpog‘iston Respublikasida — 8,6 foiz qayd etilgan.

 

Tarmoqlar bo‘yicha eng yuqori o‘rtacha ish haqi moliya va sug‘urta sohasiga to‘g‘ri kelgan — 19,1 mln so‘m. Axborot va kommunikatsiya xizmatlarida o‘rtacha ish haqi 17,4 mln so‘mni tashkil etgan.

 

Eng past o‘rtacha ish haqi qishloq xo‘jaligida — 3,5 mln so‘m, ijtimoiy xizmatlarda esa 4,7 mln so‘m bo‘lgan.

 

Ish haqining o‘sish sur’ati tashish va saqlash sohasida 22,8 foiz, ijtimoiy xizmatlarda 20,2 foiz, qurilishda esa 19,9 foizni tashkil etgan.

 

Markaziy bank qurilish, sanoat, tashish va saqlash sohalarida ish haqi o‘sishining tezlashishini mehnatga talabning yuqoriligi hamda malakali kadrlar uchun raqobatning kuchayishi bilan izohlagan.

 

Shuningdek, 2026-yil 1-iyun holatiga O‘zbekistonda faoliyat yuritayotgan korxona va tashkilotlar soni 471 mingtaga yetgan. Bu ko‘rsatkich yil boshiga nisbatan 7,2 foizga ko‘p.