Kam ta’minlangan oila farzandlari uchun pullik to‘garaklarga imtiyozlar beriladi

 

O‘zbekistonda kam ta’minlangan oilalar farzandlari uchun qo‘shimcha ta’lim olish imkoniyatlari kengaytirilmoqda. Endilikda IT, chet tili, kasb-hunar va boshqa yo‘nalishlardagi pullik to‘garaklarga qatnashayotgan bolalar xarajatlarining 80 foizigacha davlat tomonidan qoplab beriladi.

 

Bu tartib Vazirlar Mahkamasining 14-iyundagi qarori bilan tasdiqlandi. Qarorga muvofiq, mablag‘lar 2025-yil mart oyidan boshlab ajratilishi belgilangan bo‘lib, dastlabki bosqichda davlat budjetidan 200 milliard so‘m ajratiladi.

 

Unga ko'ra:

• 14 ta tuman, 549 ta mahalla, 6322 nafar o‘quvchi qamrab olinadi.
• To‘garaklar xususiy sektor bilan hamkorlikda tashkil etiladi.
• O‘quvchilar IT, xorijiy tillar, oliy ta’limga tayyorlov, kasbiy yo‘nalishlar va umumta’lim fanlari bo‘yicha mashg‘ulotlarga qatnashadi.
• 7–11 yoshli o‘quvchilarga to‘garaklar faqat davlat maktablari tomonidan taqdim etiladi.

 

Imtiyozdan foydalanish tartibi:

• Ota-onalar maxsus elektron platforma orqali to‘garakni tanlaydi, shartnoma tuzadi va xarajatlarning 80 foizigacha kompensatsiya oladi.
• O‘quvchi bir vaqtning o‘zida 2 tagacha to‘garakka, 9 oygacha bo‘lgan muddatga qatnashishi mumkin.
• Imtiyozdan maktabni tamomlaguncha 2 marta foydalanish mumkin.
• To‘garakni muvaffaqiyatli tugatganlik haqida sertifikat olish talab etiladi.
• Davomat qat’iy nazorat qilinadi, biometrik yoki geolokatsiyali elektron tizim orqali har darsda belgilab boriladi.

 

To‘lov chegaralari:

• 1 BHM (375 ming so‘m) – 7−11 yoshli bolalar uchun uzaytirilgan guruh;
• 2 BHM (750 ming so‘m) – 12−18 yoshli o‘quvchilar uchun fan va til to‘garaklari;
• 4 BHM (1,5 mln so‘m) – 15−18 yoshli o‘quvchilar uchun IT va kasbiy to‘garaklar.

 

E’tiborga olish kerak bo‘lgan holatlar:

• YAIDXP ma’lumotlari tasdiqlanmagan bo‘lsa;
• Davomat boshqa joyda qayd etilsa;
• Elektron platformaga boshqa bolaning surati yuklansa — kompensatsiya bekor qilinadi.

 

Elektron platforma 2025-yil 1-sentabrgacha ishga tushadi. Uni UZINFOCOM, Raqamli texnologiyalar vazirligi va Maktabgacha hamda maktab ta’limi vazirligi birgalikda ishlab chiqadi. 15-sentabrgacha esa YAIDXP orqali murojaatlarni kuzatish tizimi joriy qilinadi.

 

MMTV esa o‘quvchilarning natijalariga asoslanib, har yili to‘garaklarni reyting asosida baholaydi va natijalarni platformada e’lon qiladi.