Uzbekistan Airways 2026-yilda ikki yangi Airbus samolyotini sotib oladi
Yo‘lovchilar uchun Airspace Premium saloni tizimi mavjud.
"Uzbekistan Airways" AJ o‘zining havo kemalari parkini zamonaviylashtirish va kengaytirish bo‘yicha tizimli ishlarini davom ettirmoqda. 2026-yilda milliy aviakompaniya leasing hamkori — China Aircraft Leasing Group Holdings Limited (CALC) kompaniyasidan ikki dona yangi Airbus A321neo rusumidagi tor fuzelyajli samolyotni qabul qiladi.
Mazkur samolyotlar avvaldan muvaffaqiyatli tarzda ekspluatatsiya qilinayotgan A320neo oilasiga qo‘shiladi va aviakompaniyaning samarali, iqtisodiy va yo‘lovchiga qulay parvozlarni ta’minlashga sodiqligini yana bir bor tasdiqlaydi. Yangi samolyotlar zamonaviy konfiguratsiyada bo‘lib, unda uzoq masofali parvozlar uchun mo‘ljallangan 16 ta yotib ketuvchi biznes-klass o‘rinlari va 156 ta iqtisod klassi o‘rinlari mavjud bo‘ladi.
Airbus’ning yangi avlod Airspace Premium salon dizayni ham qo‘llaniladi — bu esa ovoz izolyatsiyasi yaxshilangan, kattalashtirilgan yukxonalari, shaxsiy makon, zamonaviy LED yoritish tizimi kabi qulayliklarni taqdim etadi. Shuningdek, samolyotda internetga ulanishingiz mumkin bo‘ladi. Har bir o‘rinda alohida ekranlar orqali filmlar, musiqalar, o‘yinlar va parvoz xaritalariga ega ilg‘or ko‘ngilochar tizim ham mavjud bo‘ladi.
Airbus A321neo — o‘z toifasida eng ilg‘or samolyotlardan biri hisoblanadi. U yuqori yoqilg‘i samaradorligi, uzoq parvoz masofasi va pasaytirilgan shovqin darajasi bilan ajralib turadi. Aynan shu xususiyatlari uni o‘rta va uzoq masofali marshrutlar uchun ideal tanlovga aylantiradi. Yangi kabina dizayni esa yo‘lovchilarga yanada qulay va zamonaviy parvoz tajribasini taqdim etadi.
