Avtomobil va’dasi bilan boshlangan firibgarlik: yuzlab fuqarolar aldangan
25 ta MChJ orqali milliardlab so‘mlik pul o‘zlashtirilgan.
Bir guruh shaxslar tomonidan tashkil etilgan 25 ta mas’uliyati cheklangan jamiyat (MChJ) orqali keng ko‘lamli firibgarlik fosh etildi. Ular fuqarolar bilan avans asosida avtomobil yetkazib berish shartnomalarini tuzib, mashinalar 120 kun ichida topshirilishini va’da qilgan. Ammo va’dalar bajarilmagan, tushgan pullar esa o‘zlashtirilgan.
Mazkur holat yuzasidan O‘zbekiston Jinoyat kodeksining 168-moddasi 4-qismi “a, v” bandlari asosida jinoyat ishi qo‘zg‘atilgan. Dastlabki tergovda 843 nafar fuqaroga jami 50,1 milliard so‘m zarar yetkazilgani aniqlangan.
Tergov doirasida ushbu MChJlarga tegishli 339 ta transport vositasi musodara qilingan. Hozirga qadar 9 nafar gumonlanuvchiga nisbatan ayblov e’lon qilingan bo‘lib, ularga “qamoq” tarzidagi ehtiyot chorasi qo‘llanilgan.
Huquqni muhofaza qiluvchi organlar tomonidan ish bo‘yicha surishtiruv ishlari davom ettirilmoqda.
