Qashqadaryoda oilaviy mojaro fojia bilan yakunlandi
Erini pichoq bilan o‘ldirgan ayolga sud hukmi o‘qildi.
Qashqadaryoda erini oshxona pichog‘i bilan o‘ldirgan ayolga sud hukmi e’lon qilindi. Jinoyat ishlari bo‘yicha Kasbi tuman sudi ayolni aybdor deb topib, unga 6 yil muddatga ozodlikdan mahrum qilish jazosini tayinladi.
Aniqlanishicha, voqea avvalroq ayolning turmush o‘rtog‘i tomonidan talaba qizi va o‘ziga nisbatan haqoratli so‘zlar ishlatilganidan keyin sodir bo‘lgan. Erkak 8 yillik mehnat muhojirligidan so‘ng uyga qaytib, mehmonlar ishtirokidagi ziyofat chog‘ida ayolini va qizini xiyonatda ayblab, og‘ir haqorat qilgan.
Ayol o‘zining aytishicha, voqea kuni kechasi yana janjal boshlangan. U o‘zini va qizini himoya qilish maqsadida, jahl ustida erining bo‘yin qismiga ikki marta pichoq bilan zarba bergan.
Sud jarayonida ayol qilgan ishini tan olib, "Men erimdan hayotim uchun xavfsiradim. U meni o‘ldirmoqchi bo‘ldi. Men ataylab qilmaganman", degan.
