“Navoiy kon-metallurgiya kombinati” jamoatchilik uchun ochiqmi?

Jamoatchilik nazoratining mavjudligi fuqarolik jamiyatining muhim sharti hisoblanadi. Aynan jamoatchilik nazorati orqali ijtimoiy-iqtisodiy, siyosiy-huquqiy muammolar kun tartibiga olib chiqiladi va hal etib boriladi. Shu bilan birga, jamoatchilik nazorati davlat va jamoat tashkilotlari o‘rtasida samarali hamkorlikni taʼminlashning muhim vositasi sifatida namoyon bo‘ladi.

 

O‘zbekiston Respublikasining “Jamoatchilik nazorati to‘g‘risida”gi qonunida jamoatchilik nazoratining shakllari belgilangan bo‘lib, davlat organlariga murojaatlar va so‘rovlar, jamoatchilik muhokamasi, jamoatchilik eshituvi, fuqarolarning o‘zini o‘zi boshqarish organlari tomonidan davlat organlari mansabdor shaxslarining hisobotlari va axborotini eshitish shular jumlasidandir.

 

Shu maʼnoda O‘zbekiston isteʼmolchilar huquqlarini himoya qilish jamiyatlari federatsiyasi korxonalar faoliyatining ishlab chiqarish, ekologik va sanitariya-gigiyenik talablarga muvofiqligi, ijtimoiy infratuzilma obyektlarining holati, ko‘rsatilayotgan xizmatlar sifati, atrof-muhit muhofazasi, xavfsizlik choralari yuzasidan isteʼmolchilar fikrini o‘rganish, fuqarolarning huquq va qonuniy manfaatlarining taʼminlanishini baholash maqsadida respublikamizdagi yirik korxonalardan sanaluvchi “Navoiy kon-metallurgiya kombinati” AJ hamda “Navoiyuran” davlat korxonasiga jamoatchilik so‘rovi kiritdi.

 

Ushbu so‘rov natijalariga ko‘ra, kelgusida jamoatchilik eshituvini tashkil etish rejalashtirilgan.

 

Bugungi kunda xalqimizda faol fuqarolik pozitsiyasi shakllanmoqda. Jamiyatdagi har bir voqelikka munosabat bildirishga intilish ortib bormoqda. Shu bois korxona va tashkilotlar o‘z faoliyatlarini jamoatchilik bilan yaqin hamkorlikda, ochiqlik va oshkoralik prinsiplari asosida tashkil etishlari zarur.

 

Maʼlumot uchun: “Navoiy kon-metallurgiya kombinati” jahondagi oltin ishlab chiqarish bo‘yicha yetakchi to‘rtta kompaniyadan biri bo‘lib, Markaziy Osiyodagi eng yirik oltin qazib oluvchi korxona hisoblanadi.