AQSHda ikki nafar O‘zbekiston fuqarosiga noqonuniy migratsiya bo‘yicha ayblov qo‘yildi
Ular AQSHga noqonuniy muhojirlar olib kirishda gumon qilinmoqda.
AQSHda ikki nafar O‘zbekiston fuqarosi — 30 yoshli Behzod Rahmatov (Ohaio shtati, Maysnvil shahri) va 31 yoshli Munis Xojiev (Pensilvaniya shtati, Filadelfiya shahri) AQSHga noqonuniy muhojirlarni moliyaviy manfaat evaziga olib kirishda ayblanib, qo‘lga olindi. Bu haqda AQSHlik advokat Devid Metkalf ma’lum qildi.
Rasmiy ayblov xulosasiga ko‘ra, mazkur shaxslar dastlab tanishlaridan birining mamlakatga noqonuniy kirib kelishiga ko‘maklashgan. Keyinchalik ular ushbu faoliyatni kengaytirib, boshqa xorijiy fuqarolarni ham AQSHga noqonuniy ravishda olib kirish sxemalariga jalb qila boshlagan.
Ma’lumotlarga ko‘ra, 2022-yil dekabridan 2025-yil mayiga qadar Rahmatov va Xojiev Pensilvaniyaning Sharqiy okrugi va undan tashqarida faoliyat yuritib, turli xorijiy fuqarolarni Meksika orqali AQSH chegarasiga olib kelish uchun ularga viza va pasportlar olishda yordam ko‘rsatgan. Ular bu xizmatlari evaziga muhojirlarning o‘zlari yoki ularning vakillaridan pul o‘tkazmalarini qabul qilib olishgan.
Ayblanuvchilar AQSHga o‘zlari ham qonuniy bo‘lmagan yo‘l bilan kirganlikda gumon qilinmoqda. Agar ayblovlar tasdiqlansa, har biriga 10 yilgacha ozodlikdan mahrum qilish jazosi tayinlanishi mumkin.
Mazkur ish Federal qidiruv byurosi (FQB) tomonidan tergov qilinmoqda. Sud jarayonida ayblovlarni federal prokuror yordamchilari Deniyel Beytman va Everett Viterell ilgari suradi.
