Toshkentda ayol o‘g‘li bilan tortishib qolgan bolani kaltakladi
Bola tan jarohati olgan, ayol esa maʼmuriy javobgarlikka tortilgan.
Ijtimoiy tarmoqlarda Toshkent shahrining Olmazor tumanida ayol bolalar maydonchasida voyaga yetmagan bolani urganligi aks etgan video tarqalib, turli muhokamalarga sabab bo‘lmoqda. Holat yuzasidan shahar IIBB rasmiy munosabat bildirdi.
Qayd etilishicha, 28 aprel kuni soat 16:00 larda Olmazor tumani Shifokorlar mahallasi hududidagi ko‘p qavatli uylar oldida 1989 yilda tug‘ilgan M.A bolalar maydonchasida uning farzandi bilan tortishib qolgan voyaga yetmagan K.M.ni urganligi aniqlangan. Natijada jabrlanuvchi shifoxonaga murojaat qilgan. Sudga oid tibbiy ekspertizaning xulosasiga ko‘ra, og‘irlik darajasi bo‘yicha sog‘liqni qisqa muddatga buzilishiga olib kelmagan yengil tan jarohati deb baholangan.
Mazkur holat yuzasidan fuqaro M.A. Maʼmuriy javobgarlik to‘g‘risidagi kodeksining 52-moddasi (“Yengil tan jarohati yetkazish”) bilan maʼmuriy javobgarlikka tortilib, sud tomonidan jarima jazosi tayinlangan.
