Ko‘kdaladagi fojiada halok bo‘lgan har bir fuqaro oilasiga 100 million so’m beriladi
Jarohatlanganlarga esa 50 million so‘mdan ajratiladi.
2025-yil 16-iyul kuni Ko‘kdala tumanining "Oltin dala" mahallasida gaz tarqatish shahobchasida yong‘in sodir bo‘lgan. Rasmiy ma'lumotlarga ko'ra, yong'inda 4 kishi halok bo'lgan, shungdek 20 dan ortiq odam jarohatlangani aytilgan.
Davlatimiz rahbari topshirig‘iga ko‘ra, ushbu hodisada jabr ko‘rgan fuqarolarga moddiy yordam ajratildi. Jumladan yong'inda halok bo'lgan fuqarolarning oilalariga 100 million so‘mdan, jarohat olib hozirda davolanayotganlarga esa 50 million so‘mdan naqd pul shaklida kompensatsiya to‘lab berildi.
Kompensatsiya mablag‘lari tuman hokimi va boshqa hokimlik mas’ullari ishtirokida bevosita fuqarolarning xonadonlari va davolanayotgan joylariga yetkazib berildi. Shuningdek, jarohatlangan fuqarolar to‘liq sog‘ayib ketguniga qadar malakali shifokorlar tomonidan bepul tibbiy xizmat bilan ta’minlanadi.
Bundan tashqari, davolanish jarayonida dori-darmon xarajatlari ham to‘liq davlat tomonidan qoplanishi ma’lum qilindi. Hozirda voqea yuzasidan zaruriy yordam va qo‘llab-quvvatlash ishlari davom etmoqda.
