Namanganda ikki voyaga yetmagan bola cho‘kib ketdi
Halok bo‘lgan bolalardan birining jasadi ikki kundan keyin topilgan, ikkinchi bolani qidirish ishlari esa besh kundan beri davom etmoqda.
Ijtimoiy tarmoqlarda tarqalgan xabarlarga ko‘ra, Namanganda ikki nafar maktab o‘quvchisi Shimoliy Farg‘ona kanaliga cho‘milish uchun kelib, cho‘kib ketgan. Ushbu hodisada bolalardan biri halok bo‘lib, jasadi ikki kundan keyin topilgan, ikkinchisini esa qidirish ishlari besh kundan beri davom etayotgani aytilgan.
Rasmiy ma’lumotlarga ko‘ra, 2024-yil 23-iyul kuni soat 13:48 da 112–yagona dispetcherlik xizmatiga Namangan tumani Mirishkor mahallasida yashovchi, 2009-yilda tug‘ilgan voyaga yetmagan o‘smir suvda cho‘kib ketgani haqida xabar kelib tushgan. Shundan so‘ng zudlik bilan suv usti va suv osti qidiruv ishlari boshlangan.
Hozirda Namangan, Chust va Pop tumanlarining Favqulodda vaziyatlar bo‘limlariga qarashli yong‘in-qutqaruvchilar hamda boshqarma tarkibidagi g‘avvoslar tomonidan kanalning suv osti va suv yuzasida izlash ishlari olib borilmoqda. Qidiruv ishlari uzluksiz davom ettirilayotgani bildirildi.
Namangan viloyati Favqulodda vaziyatlar boshqarmasi Axborot xizmatining ma’lum qilishicha, ushbu fojiali hodisa bo‘yicha to‘liq rasmiy tafsilotlar e’lon qilinadi. Shu bilan birga, FVB aholiga suv havzalarida ehtiyotkorlik choralariga qat’iy rioya qilishni tavsiya qilmoqda.
