Qoraqalpog‘istonda bir oiladan uch kishi cho‘kib ketgani aytilmoqda
Qidiruv ishlari davomida ikki jasad topilgan.
Qoraqalpog‘iston Respublikasining Elliqqalʼa tumanida joylashgan Akchakul suv havzasida fojiali hodisa yuz berdi. Dastlabki ma’lumotlarga ko‘ra, bir oiladan uch nafar fuqaro cho‘kib ketgan. Bu haqda Kar24.uz xabar bergan.
Favqulodda holatlar xizmatiga kelib tushgan xabarga asosan, hodisa joyida qidiruv-qutqaruv ishlari olib borilgan. Natijada hozirgacha ikki kishining jasadi topilgan, uchinchi shaxsni izlash ishlari esa davom etmoqda.
Cho‘kib ketgan fuqarolar Beruniy tumanida yashaganligi ma’lum qilindi. Hodisaning sabablari va boshqa tafsilotlari hozirda maxsus komissiya tomonidan o‘rganilmoqda.
Mutasaddilar aholiga suv havzalarida ehtiyot choralariga qat’iy rioya qilishni eslatib o‘tmoqda. Suvda cho‘kish bilan bog‘liq hodisalar yoz oylarida keskin ortadi, bu esa xavfsizlikka e’tiborni kuchaytirishni talab qiladi.
