Elektron imzo xavfsizligi bo‘yicha Sherzod Kudbiyevga rasmiy murojaat yo‘llandi
Murojaatda ERI faqat ro‘yxatdan o‘tgan qurilmalar orqali ishlashi va FaceID orqali autentifikatsiya joriy etilishi taklif qilindi.
Oliy Majlis Qonunchilik palatasi deputati Zebo Mirzazieva tomonidan Davlat soliq qo‘mitasi raisi Sherzod Kudbiyev nomiga elektron raqamli imzo (ERI) xavfsizligi yuzasidan deputatlik so‘rovi yuborildi.
So‘rovda quyidagi holatlar qayd etilgan: — Aholi orasida ERI vositasida davlat xizmatlaridan foydalanish kengayib bormoqda;
— Biroq moliyaviy va raqamli savodxonlikning pastligi ayrim fuqarolarning firibgarlik qurboniga aylanishiga sabab bo‘lmoqda;
— Ba’zilar ERI kalitini uchinchi shaxslarga topshirib, ularning nomidan qonuniy harakatlar amalga oshirilishiga imkon yaratmoqda.
Deputat tomonidan quyidagi chora-tadbirlar taklif etildi:
ERI faqat ro‘yxatdan o‘tgan qurilmalar (kompyuter yoki smartfon) orqali ishlashi;
Agar boshqa qurilmada foydalanilsa, FaceID orqali shaxsni tasdiqlash talabi joriy etilishi;
Har qanday holatda ERI orqali tizimga kirilganda FaceID orqali autentifikatsiya talab qilinishi (xuddi bank kartalaridagi kabi).
Kudbiyevdan ushbu takliflar yuzasidan 10 kun ichida asosli fikr va rasmiy javob yo‘llanishi so‘ralgan.
