“Abdulloh” O'zbekiston Prezidentiga tajovuz qilishda ayblanib qamaldi
Bloger Yugay Valeriy 3 yil 1 oy muddatga ozodlikdan mahrum qilindi.
“Abdulloh” nomi bilan tanilgan bloger Yugay Valeriy jinoyat ishlari bo‘yicha Nurafshon shahar sudi hukmiga ko‘ra, 3 yil 1 oy muddatga ozodlikdan mahrum qilindi. Bu haqda Oliy sud matbuot kotibi Aziz Obidov ma’lum qildi.
Avvalroq ijtimoiy tarmoqlarda blogerning 2024-yilning oktyabr–noyabr oylarida Koreya Respublikasida bo‘lgan davrida O‘zbekiston fuqarolarini haqorat qilgan videolari tarqalgan edi. Shu sababli u Abu Dabi–Samarqand reysi orqali O‘zbekistonga olib kelingan va protsessual tartibda ushlangan.
Sud hukmiga ko‘ra, bloger Jinoyat kodeksining 156-moddasi (milliy, irqiy, etnik yoki diniy adovat qo‘zg‘atish) 2-qismi va 158-moddasi (O‘zbekiston Respublikasi Prezidentiga tajovuz qilish) 3-qismi bo‘yicha aybli deb topilgan. Belgilangan jazo manzil-koloniyalarda o‘taladi.
Sud qaroriga binoan, birinchi instansiya hukmi ustidan belgilangan tartibda Toshkent viloyat sudi jinoyat ishlari bo‘yicha sudlov hay’atiga apellyatsiya yoki kassatsiya tartibida shikoyat qilish imkoniyati mavjud.
