O‘zbekistonda aholini ro‘yxatga olishning dastlabki natijalari 2026-yil 1-iyulgacha eʼlon qilinadi
Yakuniy rasmiy statistik maʼlumotlar esa 2027-yil 1-iyulgacha taqdim etiladi.
Hozirgi vaqtda mamlakatda aholi va qishloq xo‘jaligini ro‘yxatga olish tadbirining ikkinchi bosqichi — anʼanaviy usulda, yaʼni xonadonma-xonadon yurib maʼlumot to‘plash jarayonlari davom etmoqda. Mazkur umumrespublika tadbiri doirasida keng ko‘lamli statistik maʼlumotlar yig‘ilib, ularni qayta ishlash, tekshirish va tahlil qilish ishlari bosqichma-bosqich amalga oshirilmoqda.
Mutaxassislar taʼkidlashicha, ro‘yxatga olish natijalarini eʼlon qilish jarayoni to‘plangan maʼlumotlar hajmi katta bo‘lgani sababli maʼlum vaqtni talab etadi. Xalqaro tajribada ham shunga o‘xshash tadbirlarda yakuniy natijalarni qayta ishlash va eʼlon qilish 2–3 yilgacha davom etishi kuzatilgan.
Shu bilan birga, O‘zbekistonda maʼlumotlarni kiritish bosqichidayoq zamonaviy mantiqiy nazorat mexanizmlari joriy etilgan. Real vaqt rejimidagi ogohlantirish tizimi orqali yuzaga keladigan xato va kamchiliklar darhol aniqlanib, tezkor tarzda bartaraf etilmoqda. Bu esa umumiy qayta ishlash jarayonini sezilarli darajada tezlashtirishga xizmat qilmoqda.
Mazkur yondashuv asosida aholini ro‘yxatga olishning dastlabki natijalarini 2026-yil 1-iyulgacha eʼlon qilish rejalashtirilgan. To‘liq tahlil qilingan, yakuniy va rasmiy statistik maʼlumotlarni esa 2027-yil 1-iyulgacha jamoatchilikka taqdim etish ko‘zda tutilgan.
